Këshilli i Sigurimit i Kombeve të Bashkuara miratoi të hënën një rezolutë të hartuar nga Shtetet e Bashkuara, e cila mbështet planin e paqes të presidentit Donald Trump për Gazën. Dokumenti, i votuar nga 13 shtete anëtare dhe i abstenuar nga Rusia dhe Kina, hap rrugën për krijimin e një force ndërkombëtare stabilizimi dhe vendosjen e një autoriteti kalimtar që do të mbikëqyret personalisht nga Trump.
Rezoluta përkrahu planin prej 20 pikash të paraqitur nga Trump në shtator, i cili parasheh ngritjen e një organi të ri qeverisës të quajtur “Bordi i Paqes”. Ky bord, që do të udhëhiqet nga vetë presidenti amerikan, pritet të marrë përsipër mbikëqyrjen e rindërtimit, administrimit dhe proceseve të tranzicionit në Rripin e Gazës. Sipas Trump, anëtarët e bordit do të emërohen “në javët e ardhshme”.
Një element tjetër kyç i rezolutës është krijimi i një Force Ndërkombëtare të Stabilizimit, e cila do të dislokohet në Gaza për të monitoruar kufijtë, për të garantuar sigurinë dhe për të zbatuar procesin e demilitarizimit. Rezoluta shënon një ndërhyrje të pashembullt ndërkombëtare në territor, me kompetenca të gjera operative.
Trump e cilësoi votimin si “një nga miratimet më të mëdha në historinë e OKB-së”, duke shtuar se do të sillte “paqen e mëtejshme për botën”.
Reagimi i Hamasit
Lëvizja Hamas e kundërshtoi fuqimisht rezolutën, duke deklaruar se dokumenti nuk i përmbush kërkesat politike dhe humanitare të palestinezëve. Sipas një deklarate të grupit, vendosja e një force ndërkombëtare me mandate për çarmatim “e zhvesh atë nga neutraliteti” dhe e shndërron në “palë të konfliktit në favor të pushtimit”.
Qëndrimi i SHBA në OKB
Duke folur para Këshillit të Sigurimit, ambasadori amerikan Mike Waltz e quajti rezolutën “historike dhe konstruktive”. Ai theksoi se dokumenti përfaqëson një hap vendimtar drejt një “Gaze të qëndrueshme” dhe krijimit të kushteve që “Izraeli të jetojë në siguri”.
Çështja e shtetit palestinez
Edhe pse rezoluta hap një mundësi për shtet të pavarur palestinez, ajo nuk përmban afate kohore apo garanci konkrete. Ajo e lidh perspektivën shtetformuese me progresin në rindërtimin e Gazës dhe reformat e Autoritetit Palestinez në Bregun Perëndimor.
Vendet arabe kishin kërkuar për dy javë që SHBA të forconte gjuhën mbi të drejtën e vetëvendosjes palestineze, por versioni final mbeti më i kujdesshëm.
Qëndrimi i Izraelit
Kryeministri izraelit Benjamin Netanyahu, pak para votimit, ritheksoi kundërshtimin e tij ndaj një zgjidhjeje me dy shtete, duke sinjalizuar se implementimi i planit do të përballet me sfida të mëdha politike.
Rezoluta shënon një moment të rëndësishëm diplomatik, por mbetet për t’u parë se si do të zbatohet në terren dhe si do të pranohet nga palët në konflikt.
