Një operacion i ndërlikuar ushtarak, i shoqëruar me përleshje të armatosura, humbje mjetesh ajrore dhe manovra të sofistikuara inteligjence, ka çuar në shpëtimin e pilotit amerikan të rrëzuar në Iran, pas më shumë se 36 orësh kërkimi intensiv.
Sipas raportimeve ndërkombëtare, piloti i avionit luftarak F-15E Strike Eagle ishte fshehur në një zonë malore, i armatosur vetëm me pistoletën e tij dhe duke shmangur forcat iraniane që po e kërkonin aktivisht. Prioriteti kryesor për ushtrinë amerikane ishte lokalizimi dhe nxjerrja e tij nga territori armik para se të kapej.
Operacioni përfshiu qindra pjesëtarë të forcave speciale, dhjetëra avionë luftarakë, helikopterë, dronë dhe sisteme të avancuara të inteligjencës. Në fazat përfundimtare, raportohen edhe shkëmbime zjarri mes forcave amerikane dhe atyre iraniane.
Për të mbajtur larg forcat kundërshtare, avionët amerikanë goditën objektiva në terren, ndërsa njësitë speciale u afruan drejt zonës ku ndodhej piloti. Koordinimi u realizua përmes pajisjeve të komunikimit që kishte në dispozicion piloti.
Situata u komplikua më tej kur dy avionë transporti që do të përdorëshin për evakuim mbetën të bllokuar në tokë. Për të shmangur kapjen nga armiku, forcat amerikane vendosën t’i shkatërrojnë ato dhe të dërgojnë mjete të tjera për evakuimin e personelit.
Gjatë operacionit, një helikopter amerikan UH-60 Black Hawk u godit, duke shkaktuar të plagosur në ekuipazh, por arriti të vazhdojë fluturimin. Ndërkohë, raportimet flasin për humbje të konsiderueshme të mjeteve ushtarake, përfshirë avionë dhe dronë.
Një element kyç i operacionit ishte edhe ndërhyrja e inteligjencës amerikane. Sipas burimeve, CIA përdori një strategji dezinformimi për të çorientuar autoritetet iraniane, duke përhapur lajme të rreme mbi vendndodhjen e pilotit. Paralelisht, përmes kapaciteteve të avancuara, agjencia arriti të identifikojë pozicionin e saktë të tij dhe ta ndajë me Pentagonin.
Pas shpëtimit, piloti i plagosur u dërgua në Kuvajt për trajtim mjekësor, ndërsa operacioni po konsiderohet nga zyrtarët si një nga më kompleksët e këtij lloji në vitet e fundit.
Megjithatë, versioni i ngjarjes mbetet i kontestuar. Autoritetet iraniane vazhdojnë të mohojnë shpëtimin e pilotit dhe pretendojnë se kanë shkaktuar humbje të mëdha për forcat amerikane gjatë operacionit.
Ky zhvillim vjen në një kohë tensionesh të larta në rajon, duke reflektuar rrezikun dhe kompleksitetin e operacioneve ushtarake në një konflikt gjithnjë e më të ashpër.Burimi:Corriere della Sera
