Dy shtetas shqiptarë, 25 dhe 36 vjeç, kanë rënë në prangat e policisë italiane pas një operacioni antidrogë në Sant’Enea, Perugia. Arrestimi i tyre ndodhi gjatë një shkëmbimi droge, ku njëri prej të dyshuarve tentoi të ikte me rreth 2 kilogramë kokainë, ndërsa tjetri kishte 70 mijë euro të fshehura në automjet.
Hetimet çuan më tej në kontrolle të shpejta në banesa të ndryshme. Në një shtëpi pranë vendngjarjes, policia gjeti edhe 2 kg kokainë shtesë, materiale për paketim dhe 7,500 euro.
Ndërkohë, në një tjetër banesë në Castelnuovo Berardenga (Siena), u sekuestruan 10 kg kokainë e pastër dhe 16,000 euro cash.
Në total, autoritetet italiane kanë sekuestruar 15 kilogramë kokainë dhe rreth 100 mijë euro, ndërsa të arrestuarit akuzohen për trafik droge dhe posedim me qëllim shitjeje.
Sipas hetimeve, pas dy shqiptarëve dyshohet të qëndrojë një rrjet i organizuar trafiku që operon mes rajoneve të Umbrias dhe Toskanës.
