Policia e Kosovës ka zhvilluar sot një operacion të gjerë antidrogë në rajonin e Prishtinës, gjatë të cilit janë arrestuar gjashtë persona të dyshuar për shitblerje të narkotikëve dhe janë sekuestruar sasi të konsiderueshme prove materiale.
Operacioni, i koduar “Lugu”, u realizua nga Drejtoria për Hetimin e Trafikimit me Narkotikë në bashkëpunim me njësi të tjera të sigurisë, nën autorizimin e Prokurorisë Themelore në Prishtinë dhe me urdhër të Gjykatës. Kontrollet u kryen në tetë lokacione të ndryshme, përfshirë shtëpi, banesa, objekte përcjellëse dhe një lokal i llojit “free shop”, i cili u mbyll me urdhër të prokurorit.
Sipas njoftimit zyrtar, të dyshuarit – të gjithë shtetas të Kosovës – ishin në hetim për përfshirje në veprimtari kriminale të shpërndarjes së substancave narkotike. Në aksion morën pjesë edhe Njësia Speciale Operative, Drejtoria e Teknikës Kriminalistike, njësia K9 dhe njësitë patrulluese nga rajoni i Prishtinës.
Gjatë kontrollit u sekuestruan:
-
300 gramë substancë e dyshuar si kokainë (me vlerë rreth 18,000 euro),
-
13,294 euro para të gatshme,
-
2 pajisje DVR,
-
5 automjete me targa vendore,
-
dhe prova të tjera materiale që lidhen me veprimtarinë kriminale.
Të arrestuarit janë shoqëruar për intervistim në praninë e avokatëve mbrojtës dhe me vendim të prokurorit janë ndaluar për 48 orë.
Policia e Kosovës thekson se mbetet e përkushtuar në luftimin dhe parandalimin e shpërndarjes së narkotikëve në vend dhe bën thirrje për bashkëpunim nga qytetarët në raportimin e çdo veprimtarie të dyshuar kriminale.
