Presidentja e Republikës së Kosovës, Vjosa Osmani, gjatë vizitës së saj zyrtare në Arabinë Saudite, ka zhvilluar takime të rëndësishme me Guvernatorin e Fondit të Investimeve Publike të Arabisë Saudite, Yasir Al-Rumayyan, dhe me Kryeshefin Ekzekutiv të EXPO 2030 Riad, Talal Almarri.
Në këto takime, Presidentja Osmani dhe zyrtarët sauditë diskutuan për mundësitë e investimeve strategjike, projektet zhvillimore dhe rolin e Kosovës në EXPO 2030, që do të mbahet në Riad.
“Kosova do ta ketë mundësinë të prezantojë potencialin e saj të jashtëzakonshëm në fushën e inovacionit dhe teknologjisë,” — ka deklaruar Osmani pas takimit.
Takimet janë pjesë e agjendës së saj diplomatike në Riad, që synon thellimin e marrëdhënieve ekonomike dhe bashkëpunimit ndërkombëtar me vendet e Lindjes së Mesme, veçanërisht me Arabinë Saudite, një nga ekonomitë më të fuqishme të rajonit.
Në kuadër të EXPO 2030, Kosova pritet të shfaqë projekte novatore dhe potencialin e saj në sektorin e teknologjisë dhe inovacionit, duke u pozicionuar si një vend me mundësi reale për investime dhe zhvillim të qëndrueshëm.
