Presidentja e Kosovës, Vjosa Osmani, ka deklaruar se pjesëmarrja e Kosovës në Bordin e Paqes përbën një mundësi të rëndësishme për përfshirje të barabartë në vendimmarrjen ndërkombëtare, edhe nëse në këtë forum mund të jetë i pranishëm presidenti rus Vladimir Putin.
Në një intervistë për BBC, Osmani u pyet drejtpërdrejt se si do të ndihej po të ulej pranë liderit rus në një organizatë ndërkombëtare për paqe, në një kohë kur Rusia po zhvillon luftë në Ukrainë.
Ajo theksoi se dallimi kryesor mes Bordit të Paqes dhe United Nations qëndron te mungesa e së drejtës së vetos për Rusinë.
“Ne kemi qenë duke u përpjekur të bëhemi anëtarë të Kombeve të Bashkuara për kaq gjatë, dhe Rusia na ka bllokuar për shkak të vetos së saj. Në këtë organizatë, Rusia nuk ka të drejtë vetoje. Republika e Kosovës është ftuar të jetë anëtare themeluese, një shtet i barabartë”, tha Osmani.
Presidentja e Kosovës nënvizoi se kritikat e disa shteteve perëndimore ndaj këtij bordi janë kontradiktore, pasi sipas saj, po ato vende janë ulur për vite me radhë pranë Rusisë në OKB, përfshirë edhe Mbretërinë e Bashkuar, si anëtare e përhershme e Këshillit të Sigurimit.
“Është më mirë të jesh pjesë e një organizate ndërkombëtare ku Rusia nuk ka veto dhe nuk mund ta bllokojë paqen në botë, sesa në një organizatë ku ajo e ka përdorur veton për të bllokuar paqen dhe ka shkaktuar shkatërrim, jo vetëm në Ukrainë, por edhe në Ballkanin Perëndimor”, u shpreh Osmani.
Ajo shtoi se për Kosovën, pjesëmarrja në Bordin e Paqes përfaqëson një hap drejt integrimit ndërkombëtar dhe një mundësi për të kontribuar në paqe globale, pa u penguar nga ndikimi i Rusisë dhe pa cenuar interesat strategjike të shtetit të Kosovës.
Intervista vjen në një kohë kur disa vende perëndimore kanë shprehur hezitim për t’iu bashkuar kësaj nisme të propozuar nga presidenti amerikan Donald Trump, pikërisht për shkak të përfshirjes së Rusisë në këtë strukturë.
