Presidentja e Kosovës, Vjosa Osmani, ka pritur në takim gjeneralmajor Özkan Ulutaş, pas marrjes së detyrës së komandantit të ri të KFOR-it.
Në këtë takim, Osmani e uroi gjeneralin për detyrën e re dhe për rikthimin e tij në Kosovë, duke theksuar besimin në vazhdimin e bashkëpunimit të ngushtë ndërmjet institucioneve të sigurisë të Kosovës dhe KFOR-it.
Ajo shprehu mirënjohje për përkushtimin e të gjithë pjesëtarëve të KFOR-it në ruajtjen e paqes dhe stabilitetit në vend.
Gjatë bisedës u diskutua për zhvillimet e fundit në fushën e sigurisë, përfshirë kërcënimet që vijnë nga Serbia. Presidentja Osmani vuri theks të veçantë te rreziku i përdorimit të dronëve dhe rëndësinë e koordinimit të ngushtë me KFOR-in për të parandaluar çdo tentativë destabilizuese në rajon.
