Organizata e Veteranëve të Luftës së UÇK ka reaguar ashpër ndaj përgjigjes së Dhomat e Specializuara lidhur me rezolutën e miratuar nga Kuvendi i Kosovës për ish-krerët e UÇK-së, duke e cilësuar atë si të papranueshme dhe zhgënjyese.
Në reagimin publik, OVL e UÇK-së thekson se përgjigjja e kësaj gjykate nuk mund të trajtohet si një akt formal apo administrativ, pasi sipas tyre, reduktimi i një rezolute parlamentare në një “njoftim të thjeshtë” tregon mungesë respekti ndaj institucioneve të Kosovës.
Veteranët rikujtojnë se Dhomat e Specializuara burojnë nga vetë vendimmarrja e Kuvendit të Kosovës dhe, si të tilla, nuk mund të veprojnë të shkëputura nga vullneti sovran i tij.
“Një qasje që në thelb përkthehet si ‘e kemi marrë në dijeni, por veprojmë sipas tonës’ është e dëmshme për besimin në drejtësi”, thuhet në reagim.
OVL e UÇK-së rithekson se lufta e UÇK-së ka qenë e drejtë dhe e domosdoshme për liri, ndërsa kërkon që ish-udhëheqësit e saj të trajtohen me dinjitet dhe barazi të plotë në proceset gjyqësore.
Në fund, organizata kërkon që rezoluta e Kuvendit të Kosovës të merret seriozisht dhe të reflektohet në vendimmarrje konkrete, duke theksuar se respektimi i sovranitetit dhe institucioneve të Kosovës nuk është opsion, por detyrim.
