Deputetët e AAK-së, Besnik Tahiri dhe Pal Lekaj, në konferencë për media kanë folur projektligjin e Buxhetit për vitin 2023.
Shefi i grupit parlamentar të AAK-së, Besnik Tahiri, ka thënë se Qeveria ka dështuar me mos miratimin e Ligjit të Pagave. Ndërkaq, ka shtuar se me buxhetin e propozuar për vitin 2023, shihet se rritja e pagave nuk është e përfshirë.
“Qeveria e Kosoves i ka gënjy gjithë zyrtarët publikë, duke ju thënë se do sjell Ligjin e Pagave, dhe duke mos vendosur në zbatim Ligjin e Pagave. E kanë luajtur një lojë të ulët, duke i mashtru rreth 80 mijë punëtorë të zyrtarëve publikë tash e sa kohë. Nga analizimi i buxhetit shohim se as që bëhet fjalë për rritjen e pagave në sektorin publik”, është shprehur Tahiri.
“Kërkesë e jona për Qeverinë është një amandament, ku do të kërkohet rritja lineare e pagave për së paku 30%, deri në miratim të Ligjit të Pagave, përpos zyrtarëve që janë të zgjedhur politikisht, ka shtuar ai.
Ndërkaq, deputeti Pal Lekaj ka shtuar se në buxhetin për vitin 2023, nuk parashihet askund rritja e pagave.
“Asnjë ngritje e pagave nuk është, nuk ka ngritje të pagave për shërbyesit shëndetësorë, për infermierët, për mësimdhënësit, për policinë e asnjë kategori. Me amandamentin e propozuar, do kerkojme rritjën e pagave prej 30% për gjithë punëtorët e sektorit publikë. Përndryshe nëse Qeveria prapë nuk vepron, po e shihni se në çfarë gjendje jemi, e shohim me çfarë inflacioni po përballemi. Ky propozim është i përballueshem për Qeverinë, andaj shpresoj qe do të hasim në mirëkuptim”, ka thënë Lekaj.
