Të hënën, Kosova do të përballet me një mot të paqëndrueshëm. Intervalet me diell do të ndërpriten shpesh nga vranësira të dendura, të cilat pritet të sjellin reshje lokale shiu dhe rrebeshe të shoqëruara me vetëtima e bubullimë. Pas reshjeve, në vend do të depërtojnë masa më të freskëta ajrore, duke sjellë një ulje të ndjeshme të temperaturave në orët e pasdites, megjithëse paradite ato do të mbeten ende relativisht të larta.
Situatë e ngjashme pritet edhe në Shqipëri, Maqedoninë e Veriut, Luginën e Preshevës dhe Mal të Zi, ku nga mesdita e së hënës moti do të destabilizohet dukshëm. Vranësirat e fuqishme do të gjenerojnë rrebeshe shiu, bubullima, vetëtima dhe në disa zona edhe mundësi për breshër. Vende-vende nuk përjashtohen shtrëngata të forta.
Nga e marta, moti do të stabilizohet shpejt. Megjithatë, reshje të izoluara mund të shfaqen herë pas here, kryesisht në disa rajone të Shqipërisë dhe Maqedonisë së Veriut. Temperatura do të shënojë rritje graduale, e cila do të bëhet më e ndjeshme të mërkurën.
