Kosova të martën do të përballet me mot të ndryshueshëm, me intervale kohore me diell të alternuara me vranësira lokale. Sipas parashikimeve, në disa zona të caktuara mund të shfaqen reshje të izoluara shiu në formë rigash apo rrebeshesh të shkurtëra. Erërat do të fryjnë nga drejtimi i veriut dhe verilindjes, duke sjellë një ndjesi më të freskët në ajër. Temperaturat minimale do të zbresin deri në 2°C, ndërsa ato maksimale pritet të ngjiten deri në 19°C.
Ndryshe nga Kosova, Shqipëria dhe Maqedonia e Veriut do të përballen me më shumë vranësira dhe kushte të përshtatshme për zhvillimin e rrebesheve lokale shiu të shoqëruara me vetëtima dhe bubullima. Megjithatë, edhe në këto vende do të ketë intervale të shkurtra me diell gjatë ditës.
Në Luginën e Preshevës, dita e martë parashikohet të jetë më e kthjellët dhe me më shumë orë diell, ndërsa në Mal të Zi do të mbizotërojnë vranësirat dhe reshjet lokale.
Në viset malore të larta në jug të Kosovës, si dhe në lartësitë e Maqedonisë së Veriut dhe në veri të Malit të Zi, nuk përjashtohet mundësia për reshje të dobëta bore në formë fjollash, veçanërisht në orët e mëngjesit dhe gjatë natës.
