Kosova, me ndërmjetësimin e disa shteteve partnere, në tetor siguroi njohjen e saj nga Siria, shtet i cili pas rrëzimit të Bashar al-Assad ka ndryshuar qasjen e vet ndaj Perëndimit. Kjo ngjarje po vlerësohet si një hap i rëndësishëm diplomatik që mund të hapë rrugë për marrëdhënie të reja ndërkombëtare.
Profesori dhe njohësi i çështjeve politike, Alush Gashi, thotë se tanimë Kosova mund të synojë një raund të ri njohjesh me shtete të tjera, veçanërisht në Lindjen e Mesme, me mbështetjen e Arabisë Saudite, e cila sipas tij ka luajtur rol të rëndësishëm edhe në rastin e Sirisë.
“Pas sigurimit e njohjes nga Siria, Bin Salman do të angazhohet për njohje të Kosovës nga Libani, Iraku, Indonezia dhe Tunizia”, tha Gashi për Metron, duke shprehur mirënjohje ndaj Arabisë Saudite dhe Shteteve të Bashkuara të Amerikës për mbështetjen në proceset diplomatike.
Edhe profesori i Universitetit të Qytetit të Dublinit, Gëzim Visoka, vlerëson se momentumi i krijuar në botën arabe mund të sjellë njohje të reja. Ai përmend se përveç Libanit dhe Irakut, lëvizje pozitive mund të priten edhe nga Azerbajxhani dhe Armenia.
”Momentumi i hapur në botën arabe mund të nxitë njohjen e ardhshme nga Libani, Iraku dhe ka mundësi që të lëvizin edhe Azerbajxhani dhe Armenia. Këto janë katër vende që kanë pësuar ndryshime dhe kanë ndërruar kahen strategjike”, kishte deklaruar Visoka.
Analistët vlerësojnë se ndryshimet gjeopolitike globale, përfshirë luftën në Ukrainë dhe tensionet në Lindjen e Mesme, po krijojnë një hapësirë të re për diplomacinë kosovare që të zgjerojë prezencën ndërkombëtare.
