Partia Demokratike e Kosovës (PDK) do të mbajë sot Konventën e Përgjithshme, një nga ngjarjet më të rëndësishme të saj politike, ku pritet të zgjidhet kryetari i ri i partisë.
Sipas burimeve zyrtare nga PDK, Memli Krasniqi është kandidati i vetëm në garë për këtë pozitë, çka e bën pothuajse të sigurt rizgjedhjen e tij në krye të partisë.
Konventa do të shoqërohet me prani mediatike. Gazetarët do të kenë mundësinë të ndjekin fjalimin hyrës të Memli Krasniqit, si dhe pas përfundimit të Konventës, do të mbahet një konferencë për media, ku pritet të jepen detaje të mëtejshme mbi vendimet dhe diskutimet brenda partisë.
Kjo Konventë vjen në një moment të rëndësishëm për PDK-në, e cila synon të rikonfirmojë lidershipin dhe të japë drejtim të qartë për agjendën e saj politike në vitet e ardhshme.
