Partia Demokratike e Kosovës ka reaguar ashpër ndaj ekspozitës së fundit për masakrat e luftës 1998–1999, duke e cilësuar atë si të papranueshme dhe skandaloze, pasi sipas saj shtrembëron të vërtetën historike dhe cenon dinjitetin e viktimave.
Në një reagim publik, kjo parti thekson se çdo përpjekje për relativizimin e krimeve apo manipulimin e fakteve është e rrezikshme për kujtesën kolektive dhe drejtësinë historike në vend.
Sipas deklaratës, shqetësuese mbetet fakti që, përveç tentativave të jashtme për rishkrim të historisë, një gjë e tillë po ndodh edhe brenda vendit, madje me financim publik dhe promovim institucional, duke ngritur dyshime serioze për përgjegjësinë e institucioneve.
PDK ka paraqitur një sërë kërkesash konkrete:
- Sqarim të plotë publik për mënyrën e përgatitjes dhe miratimit të ekspozitës
- Identifikimin dhe mbajtjen përgjegjës të zyrtarëve të përfshirë
- Kërkimfalje publike ndaj familjeve të viktimave dhe qytetarëve
- Hetim për elemente të mundshme penale, përfshirë keqpërdorimin e detyrës dhe të parasë publike
Në fund, theksohet se e ardhmja e vendit nuk mund të ndërtohet mbi deformimin e së vërtetës, ndërsa mbrojtja e historisë dhe respekti për viktimat konsiderohen detyrime themelore shtetërore.
