Kryetari i Mitrovicës Faton Peci, ka dalë kundër protestës së sotme të disa kryetarëve të komunave, duke e cilësuar atë si një nismë të nxitur nga agjenda politike dhe jo si një veprim në interes të qytetarëve.
Ai ka thënë se është kundër protestës së nxitur politikisht, duke theksuar se komunikimi ndërinstitucional duhet të zgjidhet përmes dialogut dhe jo përmes protestave kundër Qeverisë.
Sipas Pecit, përpjekja për ta kthyer pjesëmarrjen e kryetarëve të komunave në protestë në një praktikë të re ka “agjendë tërësisht politike” dhe nuk kontribuon në përmirësimin e shërbimeve për qytetarët.
“Komunikimi ndërinstitucional duhet të zgjidhet përmes dialogut. Kjo nismë që synon të krijohet si praktikë, ku disa kryetarë komunash paralajmëruan të marrin pjesë në një protestë kundër Qeverisë, ka agjendë tërësisht politike dhe nuk e avancon ngritjen e shërbimit ndaj qytetarit”, ka shkruar Peci.
Ai është shprehur edhe për barrën financiare të komunave, duke thënë se qindra milionë euro obligime nuk janë krijuar nga Qeveria aktuale e Albin Kurtit, por, sipas tij, janë obligime të qeverive të kaluara të koalicionit PAN.
