Manchester City e nisi sezonin e ri të Premier League 2025/26 me një fitore të thellë 4-0 ndaj Wolverhampton Wanderers më 16 gusht, në stadiumin Molineux. Erling Haaland shkëlqeu me dy gola, ndërsa debutuesit Tijjani Reijnders dhe Rayan Cherki shënuan nga një gol secili.
Pas kësaj ndeshjeje, trajneri Pep Guardiola dha një përditësim të rëndësishëm mbi të ardhmen e tij në klub, duke lënë të kuptohet se mund të zgjasë qëndrimin në Etihad përtej afatit aktual.
Guardiola, i cili në nëntor të vitit të kaluar nënshkroi një kontratë të vlefshme deri në verën e vitit 2027, më herët kishte deklaruar për GQ Spain se pas kësaj periudhe me City do të ndalonte, për t’u përqendruar tek vetja dhe shëndeti i tij.
“E di që pas kësaj faze me City do të ndalem, kjo është e sigurt. Nuk e di nëse do të jetë për një vit apo më shumë, por do të bëj një pushim,” kishte thënë ai.
Megjithatë, në një intervistë të fundit për Men in Blazers, tekniku katalanas la të kuptohet se mund të rishqyrtojë qëndrimin e tij:
“Kam edhe dy vjet kontratë, ndoshta do ta zgjas edhe dy të tjera. Pyetja është vetëm se kur do të ndalem: këtë vit, pas dy vitesh apo pas katër vitesh. Për momentin ndihem mirë. Ekipi po më jep një emocion të mirë, sidomos pas Kupës së Botës për Klube në SHBA. Pashë diçka që më mungoi sezonin e kaluar.”
Guardiola foli edhe për detajet e vogla që e bëjnë diferencën në ekipin e tij:
“Seancat stërvitore, gjuha e trupit, mbërritja në kohë, mënyra se si mbrojmë. Janë gjëra të vogla, por që tregojnë se skuadra është e përgatitur. Kjo do të na ndihmojë të jemi më të qëndrueshëm se sezonin e kaluar,” tha ai, sipas Manchester Evening News.
Guardiola mori drejtimin e Manchester City në vitin 2016, pas tre viteve te Bayern Munich. Në nëntë sezone, ai ka fituar 18 trofe me klubin anglez, përfshirë gjashtë tituj të Premier League dhe trofeun e parë të Ligës së Kampionëve në historinë e klubit.
Me suksesin e jashtëzakonshëm që ka sjellë, tifozët e “qytetarëve” shpresojnë që Pep Guardiola të zgjasë aventurën e tij në Etihad përtej vitit 2027.
