Kryetari i Prishtinës, Përparim Rama, ka reaguar ashpër ndaj deklaratave të kryeministrit në detyrë, Albin Kurti, duke i cilësuar ato si “kërcënim të hapur ndaj qytetarëve dhe demokracisë në Kosovë”.
Në një postim në Facebook, Rama shkroi se paratë publike nuk janë pronë e ndonjë partie apo lideri politik, por “janë pronë e popullit të Kosovës”, duke akuzuar Kurtin se po i përdor investimet shtetërore si mjet shantazhi elektoral.
“Deklaratat e Albin Kurtit janë kërcënim i hapur ndaj demokracisë dhe qytetarëve të Kosovës. Askush nuk ka të drejtë t’i frikësojë qytetarët me buxhetin e tyre! Paratë publike nuk janë pronë e Kurtit, as e ndonjë partie – janë pronë e popullit të Kosovës,” shkroi Rama.
Kreu i Prishtinës e quajti këtë sjellje “të turpshme, të rrezikshme dhe në kundërshtim me çdo parim demokratik”, duke theksuar se mentaliteti autokratik nuk ka vend në një shoqëri demokratike.
“Kurti po i përdor investimet shtetërore për të blerë vullnetin e njerëzve me para publike. Si kryetar i Prishtinës, nuk do të hesht përballë një mentaliteti që ndan qytetarët në ‘tanët’ dhe ‘të tjerët’. Zhvillimi nuk vjen nga kërcënimi, por nga puna e ndershme,” ka shkruar Rama.
Në përfundim, ai theksoi se çdo politikan që përdor buxhetin e shtetit për ndëshkim apo shpërblim elektoral “e ka humbur të drejtën morale për të udhëhequr”.
