Kryetari i Komunës së Prishtinës, Përparim Rama, ka njoftuar se rruga “Adem Ramadani”, e cila ishte mbyllur gjatë fundjavës për shkak të punimeve infrastrukturore, do të hapet për qarkullim nesër.
Sipas Ramës, projekti më i gjerë për rivitalizimin e kësaj zone – që përfshin ndërtimin e një tuneli dhe nënkalimi që do të lidhte sheshin “Nëna Terezë” me Prishtinën e vjetër – është penguar nga institucionet qeveritare për shkak të shqetësimeve se gjatë gërmimeve mund të zbulohen objekte me vlerë arkeologjike, përkatësisht gjurmë të mundshme parahistorike.
“E kam bërë të ditur edhe dje: projekti për rivitalizimin e rrugës ‘Adem Ramadani’, i cili është buxhetuar dhe planifikuar për të përmirësuar lidhjen mes sheshit ‘Nëna Terezë’ dhe Prishtinës së vjetër, është bllokuar nga institucionet qeveritare, me arsyetimin se mund të gjenden objekte parahistorike,” – deklaroi Rama.
Ai theksoi se ky projekt do të sillte përfitime të mëdha për qytetin, duke përfshirë zhvillimin e ekonomisë lokale, turizmit dhe promovimin e trashëgimisë kulturore.
“Ky projekt do të nxirrte në pah ndërtesat me karakter monumental, tradicional dhe historik, duke krijuar një zonë atraktive për qytetarët dhe vizitorët. Por, për fat të keq, përballemi me bllokime nga institucionet, ndaj jemi të detyruar të presim për të vazhduar tutje në aspektin ligjor,” – shtoi ai.
Pavarësisht sfidave, Rama siguroi se puna në segmentin e rrugës do të përfundojë sot, dhe rruga do të jetë e hapur për qytetarët nga nesër.
