Deputetët e zgjedhur të legjislaturës së re janë mbledhur për herë të 44-të me radhë në përpjekje për të konstituar Kuvendin e Kosovës, proces ky që vazhdon të mbetet i bllokuar në mungesë të konsensusit për zgjedhjen e kryetarit të Kuvendit.
Partia fituese e zgjedhjeve të 9 shkurtit, Lëvizja Vetëvendosje, po insiston që për këtë pozitë të nominohet deputetja Albulena Haxhiu, të cilën e konsideron si “gruan më të votuar” të zgjedhjeve të fundit. Megjithatë, ky propozim po has në kundërshtimin e partive opozitare.
Opozita ka refuzuar ta mbështesë kandidaturën e Haxhiut, duke e cilësuar atë si një “figurë përçarëse” në skenën politike dhe si pengesë për arritjen e një marrëveshjeje gjithëpërfshirëse për udhëheqjen e Kuvendit.
Pavarësisht takimeve të njëpasnjëshme dhe përpjekjeve të ndërmjetësimit, Kuvendi nuk ka arritur ende të zgjedhë kryetarin, duke e zgjatur më tej krizën institucionale dhe duke pamundësuar fillimin e punës legjislative të përbërjes së re parlamentare.
