Sot, me fillim nga ora 11:00, pritet të mbahet seanca e 49-të me radhë për përpjekjen e konstituimit të Kuvendit të Kosovës, në një proces që po zvarritet prej më shumë se dy muajsh.
Kjo përpjekje vjen teksa po afron edhe afati 30-ditor i përcaktuar nga Gjykata Kushtetuese për përfundimin e konstituimit të legjislaturës së re. Nëse Kuvendi nuk arrin të konstituohet brenda këtij afati, vendi mund të përballet me pasoja të reja institucionale.
Seanca e fundit, e mbajtur 48 orë më parë, përfundoi pa rezultat, duke u karakterizuar me tensione, debate të ashpra dhe ndërprerje të fjalës nga ana e kryesuesit të seancës, Avni Dehari, gjatë përpjekjeve për të propozuar emrat e anëtarëve për Komisionin e Votimit të Fshehtë – një hap procedural kyç për zgjedhjen e kryetarit të Kuvendit.
Procesi zyrtarisht kishte nisur më 15 prill, rreth dy muaj e gjashtë ditë pas mbajtjes së zgjedhjeve të përgjithshme. Që atëherë, Kuvendi ka dështuar të konstituohet, përkundër dhjetëra tentativave.
Seanca e sotme konsiderohet një ndër përpjekjet e fundit para se të përfundojë afati kushtetues, duke e shtuar presionin mbi subjektet politike për të arritur një marrëveshje që do të mundësonte funksionalizimin e Kuvendit dhe institucioneve tjera shtetërore.
