Moska dënon dërgimin e trupave evropiane në Ukrainë: “E papranueshme” – Franca përgjigjet: “Nuk duam luftë, por stabilitet”
Rusia ka reaguar ashpër ndaj planeve të shpallura nga Franca dhe Mbretëria e Bashkuar për dërgimin e trupave evropiane në Ukrainë, në kuadër të të ashtuquajturit “Koalicion i të Vullnetshmëve”, duke e cilësuar këtë veprim si “të papranueshëm”.
Zëdhënësi i Kremlinit, Dmitry Peskov, deklaroi se “prania e kontingjenteve ushtarake të huaja në Ukrainë, pranë kufijve tanë, është e patolerueshme”, duke akuzuar Perëndimin për një qasje “militariste dhe përçarëse”. Ai sulmoi gjithashtu kancelarin gjerman Friedrich Merz, duke e quajtur “apologjist të përplasjes me Rusinë” dhe paralajmëroi se Moska do të marrë masa përballë kësaj “mobilizimi agresiv evropian”.
Franca: “Nuk kërkojmë të fitojmë luftën, por të stabilizojmë terrenin”
Në një reagim të kujdesshëm, gjenerali Thierry Burkhard, shef i Shtabit të Përgjithshëm të ushtrisë franceze, theksoi se qëllimi i platformës ushtarake evropiane nuk është fitimi i luftës, por stabilizimi i territorit dhe krijimi i kushteve për një armëpushim të mundshëm.
“Koalicioni është një sinjal i qartë për Moskën – se Europa mund të veprojë edhe pa SHBA-në”, theksoi Burkhard, duke nënvizuar nevojën për forcimin e kapaciteteve strategjike evropiane.
Gjenerali paralajmëroi për rrezikun real të një konflikti më të gjerë në kontinent dhe theksoi se Rusia nuk ka hequr dorë nga ambiciet e saj për të dobësuar Evropën dhe për të shpërbërë NATO-n.
Kërcënime të reja: nga hapësira në nëndetë
Burkhard nënvizoi se kërcënimet ruse po shtohen dhe shtrihen përtej territorit ukrainas, duke përfshirë:
-
Manovra armiqësore në hapësirë, që shkelin traktatet ndërkombëtare.
-
Aktivitete të rrezikshme të nëndetëseve bërthamore në Atlantik dhe Mesdhe, që synojnë infrastrukturat kritike nëndetare.
-
Provokime ajrore mes avionëve rusë dhe francezë në rajone si Deti i Zi dhe Siria.
-
Fluturime të bombarduesve strategjikë rusë pranë brigjeve të Britanisë së Madhe.
“Evropa nuk mund të jetë barngrënëse në një botë me mishngrënës”
Burkhard përdori një metaforë të fortë për të përshkruar sfidën aktuale:
“Rrezikojmë të jemi barngrënës në një botë me mishngrënës”.
Ai pranoi se kërcënimi i një përplasjeje direkte me Rusinë është real dhe i besueshëm, ndërsa theksoi se mbështetja për Ukrainën nuk është më vetëm çështje solidariteti, por një domosdoshmëri strategjike për vetë Evropën.
“Nëse Rusia fiton – nuk do të jetë thjesht një humbje për Ukrainën apo Perëndimin, por një disfatë për të gjithë Evropën”, përfundoi gjenerali francez.
