Konflikti mes Izraelit dhe Iranit ka hyrë në një fazë dramatike përshkallëzimi pas një sulmi masiv ajror të kryer nga Republika Islamike e Iranit ndaj territorit izraelit.
Zëdhënësi i Forcave të Mbrojtjes së Izraelit (IDF), Gjeneral Brigade Effie Defrin, njoftoi se rreth 100 dronë iranianë janë lëshuar drejt Izraelit. Si kundërpërgjigje, ushtria izraelite ka nisur një ofensivë të përmasave të mëdha duke goditur dhjetëra objektiva ushtarake në Iran, përfshirë edhe objektiva bërthamore.
Sipas IDF-së, ndër vendet më të rëndësishme të goditura është impianti kryesor i pasurimit të uraniumit në Natanz, një qendër strategjike që përmban mijëra centrifuga të përparuara, të vendosura dhjetëra metra nën tokë. Deri tani, mbetet e paqartë se sa thellë ka arritur goditja izraelite.
Udhëheqës të lartë ushtarakë iranianë dhe shkencëtarë të vrarë
Mediat shtetërore iraniane kanë konfirmuar vrasjen e disa figurave kyçe të komandës ushtarake. Ndër të vrarët janë:
-
Hossein Salami, komandant i përgjithshëm i Gardës Revolucionare Islamike (IRGC)
-
Gjeneral Major Mohammad Bagheri, shef i shtabit të ushtrisë iraniane dhe i IRGC-së
-
Komandanti i komandës së emergjencës së Iranit (emri i papublikuar)
Përveç udhëheqësve ushtarakë, janë raportuar edhe viktima nga radhët e komunitetit shkencor iranian. Fereydoon Abbasi, ish-kreu i Organizatës së Energjisë Atomike të Iranit dhe Mohammad Mehdi Tehranchi, president i Universitetit Islamik Azad në Teheran, janë në mesin e të vrarëve.
Izraeli në gjendje të jashtëzakonshme
Pas sulmit të paprecedentë, autoritetet izraelite kanë shpallur gjendjen e jashtëzakonshme në gjithë vendin. Në anën tjetër, Televizioni shtetëror iranian ka konfirmuar se janë goditur të paktën gjashtë baza ushtarake në dhe rreth Teheranit, si dhe shtëpi të komandantëve ushtarakë dhe ndërtesa banimi.
E ardhmja e bisedimeve Iran-SHBA në pikëpyetje
Sulmi ndodh vetëm dy ditë para raundit të gjashtë të bisedimeve midis Iranit dhe SHBA-së, të planifikuara për të dielën në Muscat. Aktualisht nuk ka konfirmim nëse takimi do të zhvillohet apo do të shtyhet për shkak të gjendjes së re të krijuar.
