Pikëkalimi doganor Morinë–Vërmicë vazhdon të shërbejë si një shembull i shkëlqyer i bashkëpunimit ndërmjet Shqipërisë dhe Kosovës, duke lehtësuar ndjeshëm qarkullimin e udhëtarëve dhe shkurtuar kohën e procedurave doganore për bizneset në të dy anët e kufirit.
Në kuadër të këtij bashkëpunimi, Ministri i Financave të Shqipërisë, z. Petrit Malaj, dhe Ministri i Financave, Punës dhe Transfereve të Kosovës, z. Hekuran Murati, realizuan një vizitë të përbashkët në këtë pikë doganore, ku konfirmuan përkushtimin institucional për rritjen e cilësisë së shërbimeve doganore, funksionimin 24 orë në ditë, 7 ditë në javë, si dhe eleminimin e vonesave dhe barrierave burokratike në qarkullim.
Sipas të dhënave zyrtare, vetëm gjatë periudhës janar–maj 2025, pika doganore Morinë–Vërmicë ka përballuar me sukses një fluks prej mbi 3 milionë udhëtarësh dhe 1.1 milionë automjete, duke dëshmuar efikasitet dhe menaxhim të përbashkët në shërbim të qytetarëve dhe ekonomisë rajonale.
Kjo pikë doganore, me funksion të integruar dhe koordinim të ngushtë mes autoriteteve doganore të të dy shteteve, konsiderohet një model i bashkëpunimit ndërkufitar, që synon jo vetëm lehtësimin e qarkullimit, por edhe ndërtimin e një hapësire të përbashkët ekonomike mes Kosovës dhe Shqipërisë.
