Zëvendëspresidenti amerikan, J.D. Vance, ka mbërritur në Izrael, ku u shpreh i bindur se armëpushimi mes Izraelit dhe Hamasit do të qëndrojë në fuqi, pavarësisht vatrave të dhunës që ende raportohen në Rripin e Gazës.
Në një konferencë për shtyp nga baza ushtarake Kiriyat Gat, Vance u përpoq të përçojë qetësi dhe besim për stabilitetin e marrëveshjes:
“Armëpushimi është në fuqi dhe po ecën përpara. Kjo që po ndodh në terren është pasojë e një konflikti të gjatë mes dy popujve që kanë luftuar për dekada,” – deklaroi ai, duke minimizuar raportimet për përleshje të izoluara.
“Nuk ka ultimatum, por kush nuk bashkëpunon do të asgjësohet”
Megjithëse Vance e quajti marrëveshjen “të qëndrueshme”, ai paralajmëroi militantët e Hamasit se “nëse nuk bashkëpunojnë, do të asgjësohen”. Ai nënvizoi se SHBA nuk do të dërgojë trupa tokësore në Gaza, por do të vazhdojë rolin koordinues me forcat ndërkombëtare:
“Familjet amerikane duhet të jenë të qeta – ushtarët tanë nuk do të hyjnë në Gaza. Roli ynë është ndërmjetësimi dhe bashkërendimi i forcave të tjera ndërkombëtare në rajon.”
Vance shmang kritikat ndaj Netanyahut
Zëvendëspresidenti amerikan mohoi pretendimet e raportuara nga “New York Times” se vizita kishte për qëllim të kontrollonte qeverinë izraelite për të mos rifilluar luftën.
“Vizita ime ishte planifikuar prej kohësh,” – tha ai, duke falënderuar qeverinë izraelite “për bashkëpunimin e shkëlqyer”.
Në konferencë mungoi çdo kritikë ndaj kryeministrit Benjamin Netanyahu, ndërsa Vance e bëri të qartë se fajin për çdo shkelje të armëpushimit e mban Hamasi. Ai theksoi se “Plani Trump me 20 pika është i qartë”, dhe se procesi i çarmatimit të Hamasit nuk ka afat të përcaktuar, por “do të marrë kohë”.
Përkrah tij, Kushner dhe zyrtarë të tjerë amerikanë
Në krah të Vance ndodheshin admirali Brad Cooper, komandant i Centcom-it, si dhe dy të dërguarit e Trump-it për Lindjen e Mesme: Steve Witkoff dhe Jared Kushner.
Kushner, i njohur për rolin e tij si investitor dhe ndërmjetës ekonomik, foli për planet e rindërtimit të Gazës, duke theksuar se prioritet do të jenë zonat nën kontroll izraelit, pasi të sigurohet paqja.
“Rindërtimi do të fillojë vetëm kur siguria të garantohet përmes një force ndërkombëtare stabilizuese,” – shtoi Vance.
Presioni ndaj Hamasit dhe faza e dytë e marrëveshjes
Sipas burimeve amerikane, çmilitarizimi i Rripit të Gazës mbetet pika thelbësore e fazës së dytë të planit të paqes.
Vetë ish-presidenti Donald Trump ka paralajmëruar përmes rrjetit të tij “Truth” se aleatët arabë të SHBA-së janë të gatshëm të ndërhyjnë nëse Hamasi “vazhdon të shkelë marrëveshjen”.
Çështja e pengjeve dhe mesazhi i fundit
Ndërkohë, Hamasi ka dorëzuar trupat e dy pengjeve të tjerë të vrarë, duke e çuar në 13 numrin total të dorëzuar nga 28 të planifikuar.
“Procesi nuk mund të ndodhë brenda natës. Disa trupa janë ende nën rrënoja, për disa të tjera Hamasi ka humbur gjurmët,” – shpjegoi Vance.
Në përfundim të vizitës, Vance theksoi se do të takohet me Netanyahun dhe mund të vizitojë Kishën e Varrit të Shenjtë për t’u lutur.
“A jam 100 për qind i sigurt që armëpushimi do të qëndrojë? Jo. Por jam shumë optimist,” – përfundoi ai.
Burimi /La Repubblica
