Në komunën e Dragashit është duke u zhvilluar një projekt i fokusuar në rritjen e njohurive juridike dhe fuqizimin social të komunitetit Goran, me fokus të veçantë te gratë dhe të rejat. Aktiviteti synon të kontribuojë në ngritjen e vetëdijes për të drejtat qytetare, procedurat juridike dhe rritjen e përfshirjes së grave në jetën shoqërore dhe institucionale.
Në kuadër të projektit, janë përfshirë 20 gra dhe të reja nga Dragashi, të cilat po marrin pjesë në trajnime dhe aktivitete të ndryshme informuese. Pjesëmarrëset janë kryesisht nga zona rurale, ku nevoja për qasje në informacione juridike dhe mbështetje sociale konsiderohet e rëndësishme.
Sipas organizatorëve, aktivitetet përfshijnë trajnime juridike, takime informuese dhe sesione të dedikuara për fuqizimin e grave, me fokus në të drejtat në punë, trashëgimi, mbrojtje nga diskriminimi dhe qasjen në institucione publike. Gjithashtu po zhvillohen aktivitete sensibilizuese me qëllim të rritjes së vetëdijes në komunitet.
Projekti synon që përmes njohurive dhe aftësive të fituara, gratë pjesëmarrëse të kenë më shumë vetëbesim, të jenë më aktive në vendimmarrje dhe të kenë qasje më të lehtë në të drejtat dhe shërbimet që u takojnë. Organizatorët vlerësojnë se iniciativa pritet të ketë ndikim jo vetëm tek përfitueset direkte, por edhe në familjet dhe komunitetin më të gjerë në Dragash.
