Me urdhër të Prokurorisë Speciale të Republikës së Kosovës, Policia e Kosovës ka arrestuar një person të dyshuar, S.J., nën akuzën për kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge.”
I dyshuari është ndaluar në rajonin e Prishtinës, ndërsa gjatë kontrollit në kamionin që ai po drejtonte, policia ka gjetur dhe sekuestruar një sasi prej mbi 200 kilogramësh të substancës narkotike, që dyshohet të jetë marihuanë.
Hetuesit nga Drejtoria për Hetimin e Trafikimit me Narkotikë, në bashkëpunim me Prokurorinë Speciale, po ndërmarrin të gjitha veprimet e nevojshme hetimore në përputhje me Kodin e Procedurës Penale dhe me ligjet në fuqi.
Me vendim të Prokurorisë Speciale, i dyshuari S.J. është dërguar në mbajtje për 48 orë, ndërsa hetimet për rastin po vazhdojnë.
Prokuroria Speciale dhe Policia e Kosovës theksojnë përkushtimin e tyre të vazhdueshëm për luftimin e trafikimit dhe shpërndarjes së narkotikëve, si dhe për ndjekjen penale të të gjithë personave të përfshirë në këto veprimtari të paligjshme.
