Policia e Kosovës ka zhvilluar sot disa aksione të ndara policore në rajone të ndryshme të vendit, duke rezultuar me arrestime për falsifikim dokumentesh, vjedhje të rënda dhe ekstradimin e një personi të kërkuar ndërkombëtarisht.
Në Podujevë, është arrestuar një person i dyshuar për falsifikim të dokumenteve. Sipas policisë, i dyshuari A.B. dyshohet se ka përdorur një vulë jozyrtare për të falsifikuar dokumente për regjistrimin e së paku një automjeti. Gjatë kontrollit në zyrën e tij – agjenci sigurimi – janë sekuestruar një vulë dhe prova të tjera materiale. Me vendim të prokurorit, i dyshuari është dërguar në mbajtje.
Ndërkohë, Policia e Kosovës ka realizuar ekstradimin nga Anglia në Kosovë të një shtetasi kosovar të kërkuar me urdhërarrest ndërkombëtar për veprat penale “Vrasje në tentativë” dhe “Shkaktim i rrezikut të përgjithshëm”. Ekstradimi u bë në bashkëpunim me autoritetet angleze dhe pas mbërritjes në Kosovë, i dyshuari iu dorëzua njësive policore për vazhdim të procedurave ligjore.
Në një aksion tjetër, në rajonin e Prishtinës, janë arrestuar dy persona të dyshuar për disa raste të vjedhjeve të rënda. Të dyshuarit, 18-vjeçarë, dyshohet se janë të përfshirë në së paku tetë raste të vjedhjeve nga aparate vetëshërbimi për larje veturash. Ata janë ndaluar për 48 orë, ndërsa policia po vazhdon hetimet dhe kërkimin për katër persona të tjerë të dyshuar.
Policia e Kosovës ka bërë të ditur se do të vazhdojë veprimet hetimore dhe bashkëpunimin me institucionet vendore dhe ndërkombëtare për parandalimin dhe luftimin e kriminalitetit.
