Policia e Kosovës ka zhvilluar një aksion të suksesshëm në fshatin Rujishtë, ku rreth orës 18:30 të datës 11 dhjetor janë ndaluar katër automjete me targa të Serbisë, të dyshuara për kontrabandë me mallra.
Sipas zëdhënësit të Policisë, Baki Kelani, automjetet po lëviznin në një rrugë malore dhe brenda tyre janë gjetur mallra pa dokumentacion të prejardhjes, përfshirë tekstil, produkte ushqimore dhe mish.
Gjashtë personat që ndodheshin në këto automjete janë shoqëruar në Stacionin Policor në Mitrovicë të Veriut, së bashku me veturat e ndaluara.
“Lidhur me rastin është njoftuar Dogana e Kosovës, e cila do të vazhdojë me procedurat doganore. Me urdhër të prokurorit kujdestar, rasti është iniciuar si ‘Kontrabandim me mallra’ dhe ‘Kalim ilegal i kufirit’. Pas intervistimit, të dyshuarit do të procedohen në procedurë të rregullt,” deklaroi Kelani.
Në vendngjarje kanë vepruar edhe njësitë relevante të Policisë, ndërsa institucionet i bëjnë thirrje qytetarëve për kujdes dhe raportim të aktiviteteve të dyshimta përgjatë zonave kufitare.
