Policia e Kosovës ka sekuestruar një automjet dhe pajisje teknologjike të kundërligjshme në rrugën “Knjaz Milos” në Mitrovicën e Veriut.
Në një aksion të zhvilluar më 5 shtator, zyrtarët policorë kanë gjetur një veturë të tipit Skoda Octavia, ngjyrë hiri, me targa të Serbisë, e cila kishte dy kamera profesionale dhe pajisje GPRS të montuara. Pas verifikimit në sistemin e Policisë së Kosovës, është konstatuar se automjeti ishte futur në vend në vitin 2022 dhe qëndrimi i tij tejkalonte afatin e lejuar ligjor.
Sipas Ligjit për Automjete (05/L-132, neni 41), automjetet që qëndrojnë më shumë se tre muaj në Kosovë konsiderohen të kundërligjshme, dhe kjo veturë është proceduar më tej në Dogana e Kosovës.
Gjatë hetimeve, personi përgjegjës është paraqitur në stacionin policor më 8 shtator dhe deklaroi se automjeti i përkiste “Narodna Banka Srbije” dhe ishte përdorur më parë për transport të parave nga Serbia në Kosovë.
Kontrolli i detajuar zbuloi gjithashtu një DVR dhe një ekran monitorimi, të instaluara në shkelje të Ligjit për Mbrojtjen e të Dhënave Personale dhe Privatësinë (06/L-082). Pajisjet u konfiskuan nga përfaqësues të Agjencisë për Informim dhe Privatësi (AIP) për procedura të mëtejshme ligjore.
Policia e Kosovës rikujton qytetarët se:
-
Vendosja e kamerave ose pajisjeve regjistruese pa autorizim në hapësira private ose automjete është e ndaluar dhe konsiderohet shkelje e privatësisë.
-
Posedimi dhe qarkullimi i automjeteve me targa të huaja është i lejuar vetëm brenda afateve të përcaktuara me ligj; tejkalimi i këtyre afateve çon në konfiskim dhe procedim ligjor.
Policia apelon tek qytetarët për respektimin e ligjit dhe shmangien e veprimeve të kundërligjshme, duke theksuar se çdo shkelje do të ndëshkohet sipas dispozitave ligjore.
