Policia e Republikës së Kosovës ka prezantuar versionin e ri, të ridizajnuar, të aplikacionit mobil “Lajmëro Policinë”, duke synuar rritjen e bashkëpunimit me qytetarët dhe forcimin e sigurisë publike.
Sipas Policisë së Kosovës, aplikacioni i ri është më modern, më funksional dhe më i lehtë për përdorim. Risi kryesore e këtij versioni është mundësia që qytetarët të raportojnë raste edhe përmes videos, si dhe të ndjekin statusin e raportimit të tyre në kohë reale.
Një tjetër zhvillim i rëndësishëm është se aplikacioni tashmë është i disponueshëm edhe për përdoruesit e iPhone, duke u ofruar shërbim të plotë në të dy platformat, iOS dhe Android.
Nga Policia e Kosovës bëhet e ditur se të gjitha raportimet përmes aplikacionit mbesin plotësisht konfidenciale, ndërsa privatësia dhe siguria e të dhënave të qytetarëve janë të garantuara.
“Aplikacioni ‘Lajmëro Policinë’ mund të shkarkohet dhe të përdoret nga të gjitha pajisjet që mbështesin platformat iOS dhe Android. Me vetëm disa klikime, qytetarët mund të kontribuojnë drejtpërdrejt në rritjen e sigurisë në komunitetin e tyre,” thuhet në njoftimin zyrtar.
Policia e Kosovës u ka bërë thirrje qytetarëve që ta shkarkojnë aplikacionin përmes App Store ose Play Store, duke kërkuar “Lajmëro Policinë”, dhe të raportojnë me besim çdo rast që cenon sigurinë publike.
“Siguria është përgjegjësi e përbashkët,” thekson Policia e Kosovës, duke ftuar qytetarët për bashkëpunim të vazhdueshëm.
