Policia e Kosovës ka zbuluar një plantacion me rreth 500 bimë narkotike të llojit Cannabis Sativa në një fshat të rajonit të Gjilanit. Operacioni është zhvilluar më 23 gusht 2025, nga Drejtoria për Hetimin e Trafikimit me Narkotik – Njësia Gjilan, në bashkëpunim me institucionet tjera të sigurisë.
Sipas njoftimit, bimët ishin të mbjella në katër sera dhe ndodheshin në fazë të avancuar të zhvillimit. Gjatë kontrollit, policia ka gjetur dhe konfiskuar edhe një armë të gjatë, si dhe prova të tjera që lidhen me veprimtarinë e dyshuar kriminale.
Në lidhje me rastin, janë arrestuar tre persona të dyshuar, të cilët me vendim të prokurorit janë dërguar në mbajtje për 48 orë.
Policia ka bërë të ditur se shkatërrimi i lëndëve narkotike do të kryhet në koordinim me prokurorin kujdestar dhe organet përkatëse të drejtësisë.
