Policia e Kosovës ka ndërmarrë aksione të ndara gjatë fundjavës në rajonin e Mitrovicës së Jugut dhe në Ferizaj, duke sekuestruar armë zjarri dhe duke arrestuar disa persona të dyshuar për veprime të kundërligjshme.
Në rajonin e Mitrovicës së Jugut, njësitet policore reaguan me shpejtësi pas të shtënave në ahengje familjare. Si rezultat, në lokacione të ndryshme u konfiskuan tri armë zjarri dhe municion, dy prej tyre në Vushtrri dhe një në Skenderaj. Armët janë proceduar si dëshmi materiale, ndërsa tre persona të dyshuar u arrestuan. Dy prej tyre u liruan në procedurë të rregullt, kurse një person u mbajt në ndalim për 48 orë. Ndaj të arrestuarve janë iniciuar procedura penale për veprat “Armëmbajtje pa leje” dhe “Përdorim i armës”.
Ndërkohë, më 17 gusht 2025, në Ferizaj është raportuar një rast i “Lëndimit të lehtë trupor”. Një grua 32-vjeçare ka deklaruar në polici se ishte keqtrajtuar fizikisht nga vjehrri i saj 62-vjeçar dhe vajza e tij 20-vjeçare, pas një mosmarrëveshjeje për pronësinë e një veture. Viktima ka marrë trajtim mjekësor për lëndimet e pësuara.
Gjatë kontrollit në shtëpinë e të dyshuarve, policia ka sekuestruar një pushkë automatike me dy karikatorë. Dy personat e dyshuar janë shoqëruar në stacionin policor dhe intervistuar nga hetuesit. Me vendim të prokurorit të shtetit, ndaj tyre janë ngritur raste penale për “Lëndim të lehtë trupor” dhe “Mbajtje në pronësi, kontroll ose posedim të paautorizuar të armëve”. Të dy janë liruar në procedurë të rregullt.
