Policia e Kosovës në Mitrovicë ka ndërhyrë mbrëmjen e 14 tetorit pas raportimeve për të shtëna me armë zjarri në një lagje të qytetit.
Sipas njoftimit zyrtar, pas pranimit të informatës, njësitet policore të Stacionit Jugu kanë reaguar menjëherë dhe kanë lokalizuar vendin nga ku ishin dëgjuar të shtënat. Hetimet kanë çuar policinë në një aheng familjar, ku gjatë kontrollit janë gjetur dhe sekuestruar dy pistoleta, një pushkë gjuetie, një gëzhojë dhe 44 fishekë.
Ndaj të dyshuarit është iniciuar rast për veprat penale “Mbajtje në pronësi ose kontroll të paautorizuar të armëve” dhe “Përdorim i armës”, ndërsa me vendim të prokurorit, atij i është caktuar masa e ndalimit policor për 48 orë.
Policia ka konfirmuar se hetimet vazhdojnë me qëllim zbardhjes së plotë të rrethanave të incidentit.
