Një operacion i Policisë së Kosovës ka çuar në zbulimin dhe sekuestrimin e një sasie të konsiderueshme narkotikësh në kryeqytet. Rasti është shënuar pas mesnatës së 17 gushtit 2025, rreth orës 00:20, në rrugën “Mujë Krasniqi”, te banesat U-1 në Prishtinë.
Gjatë patrullimit në kuadër të planit operativ “Parandalimi i veprave penale”, njësia policore ka hasur një person të dyshuar, i moshës rreth 20-25 vjeç, me trup të dobët dhe flokë të bardha të shkurtra. I dyshuari nuk iu bind urdhrit të ndalimit dhe u fut me shpejtësi në një ndërtesë, duke arritur t’i shmangej policisë.
Në vijim të kontrollit, policia ka gjetur në bodrumet e ndërtesës dy çanta krahu të mbushura me substanca të dyshuara narkotike, mjete për paketim dhe një peshore digjitale. Nga vendngjarja janë sekuestruar si prova materiale:
-
Një qese me marihuanë, peshë 1.4 gram
-
Një qese me marihuanë, peshë 179.1 gram
-
Një qese me marihuanë, peshë 144.3 gram
-
Një qese me 30 paketime të vogla me marihuanë, peshë totale 46.2 gram
-
Një qese me marihuanë, peshë 164.8 gram
-
Qindra qese të vogla për paketim
-
Një peshore elektronike
-
Një palë doreza të zeza
Sasia totale e narkotikëve të sekuestruar arrin në 535.8 gram marihuanë.
Me urdhër të Prokurores kujdestare nga Departamenti i Krimeve të Rënda, rasti është klasifikuar si “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”. Hetimet e mëtejme po zhvillohen nga Njësia për Hetimin e Narkotikëve në Prishtinë.
