Një raport i publikuar nga gazeta italiane Corriere della Sera ka tronditur opinionin ndërkombëtar, duke zbuluar se inteligjenca amerikane dyshohet se ka dërguar një mesazh të drejtpërdrejtë Ajatollah Ali Khameneit, Udhëheqësit Suprem të Iranit, me një ultimatum: “Pranoni armëpushimin brenda 24 orësh, ose do të vijmë t’ju gjejmë.” Mesazhi, sipas burimeve brenda regjimit iranian që flisnin në kushte anonimiteti për median italiane, përmbante edhe koordinatat e vendstrehimit të Khameneit, duke përçuar një sinjal të qartë force.
Një “fitore” që ndodhi nën kërcënim
Sipas burimeve të Corriere della Sera, Khamenei, në rrethana të pasigurta dhe i detyruar të mbrojë si veten ashtu edhe sistemin islamik të udhëheqjes në Iran, e pranoi armëpushimin – një vendim që në mënyrë zyrtare u paraqit si një “triumf strategjik”.
Propaganda shtetërore iraniane e ka portretizuar mbylljen e konfliktit 12-ditor me Izraelin si një “fitore të lavdishme” për Iranin. Në transmetimet e televizionit shtetëror IRIB, komentatorë dhe analistë shpallën me bujë se “Republika Islamike i mbijetoi presionit ushtarak dhe diplomatik të SHBA-së dhe Izraelit, duke u detyruar ata të kërkojnë ndaljen e luftimeve.”
“Rishkrimi i historisë” dhe mbijetesa politike
Një profesor nga Teherani, në një intervistë për Corriere della Sera, e quajti këtë një tjetër shembull të “rishkrimit të realitetit nga regjimi”. “Ata rifitojnë pas çdo disfate dhe na ftojnë të festojmë në Sheshin Enghelab,” tha ai.
Ndërkohë, vetë Khamenei, ende i strehuar në një bunker sekret për shkak të frikës nga sulmet ajrore, publikoi një mesazh në rrjetin social X:
“Ata që e njohin popullin iranian dhe historinë e tij e dinë se kombi iranian nuk dorëzohet.”
Këto deklarata pasuan nga reagime të zyrtarëve të tjerë iranianë. Deputeti konservator Mahmoud Nabavian tha se Irani është shndërruar nga një “fuqi rajonale në një perandori islamike”, ndërsa ish-presidenti Hassan Rouhani paralajmëroi se armëpushimi mund të jetë “një mashtrim” dhe bëri thirrje për vigjilencë të lartë.
E ardhmja bërthamore mbetet sfidë
Pavarësisht retorikës, dilema qëndron: A do të tërhiqet Irani nga programi i tij bërthamor? Pikërisht ky ka qenë edhe shkaku kryesor i operacionit ushtarak “Rising Lion”, ndërsa kërkesat nga SHBA dhe Izraeli për “zero pasurim” mbeten në tryezë.
Zëdhënësi i Organizatës së Energjisë Atomike të Iranit, Behrouz Kamalvandi, konfirmoi vazhdimësinë e programit:
“Industria bërthamore nuk do të ndalet. Ajo ka rrënjë në këtë vend dhe nuk mund të zhduket.”
Ekspertët vlerësojnë se, nga një perspektivë ushtarake, ky është poshtërimi më i madh që Irani ka pësuar në shekullin e fundit – por në aspektin politik, regjimi mbijetoi.
“Skenari më i keq për popullin iranian”
Mina, një vajzë e re iraniane që kishte folur me gazetën në ditët e para të konfliktit, e përmblodhi ndjesinë popullore me fjalët:
“Skenari më i keq u bë realitet. Na bombarduan dhe na lanë me mullahë të plagosur, të gatshëm të na shtypin më shumë se më parë.”
Ndërsa heshtja mbretëron rreth vendimit të mundshëm për negociata të reja, një gjë duket e qartë: lufta e vërtetë për të ardhmen e Iranit sapo ka filluar.
