Presidenti i Shqipërisë, Bajram Begaj, kujtoi sot 35-vjetorin e Lëvizjes Studentore të Dhjetorit ’90, duke e cilësuar atë si momentin që i hapi vendit udhën drejt Evropës. Në një deklaratë të publikuar në rrjete sociale, Begaj u ndal te thirrja ikonike e asaj kohe: “E duam Shqipërinë si gjithë Evropa!”, që sipas tij mbetet moto orientuese edhe sot.
Begaj theksoi se guximi i studentëve dhe rinisë së asaj periudhe rrëzoi “perden e hekurt” dhe vendosi themelet e tranzicionit drejt demokracisë. Presidenti shtoi se çdo hap i Shqipërisë në procesin europian është një nderim për atë akt kuraje dhe idealizmi që ndryshoi historinë e vendit.
