Presidenti i Shqipërisë, Bajram Begaj, mbajti fjalën e tij para Asamblesë së Përgjithshme të Kombeve të Bashkuara, duke theksuar përkushtimin e Shqipërisë për paqe, siguri dhe bashkëpunim ndërkombëtar.
Në fjalimin e plotë, Begaj nënvizoi rëndësinë e dialogut dhe multilateralizmit për përballimin e sfidave globale, si luftërat, terrorizmi, ndryshimet klimatike dhe transformimi digjital. Ai deklaroi se Shqipëria do të vazhdojë të mbështesë rendin ndërkombëtar të bazuar në Kartën e OKB-së dhe në të drejtën ndërkombëtare.
Duke folur për konfliktin në Ukrainë, Presidenti Begaj dënoi agresionin rus dhe shprehu mbështetje të palëkundur për sovranitetin dhe integritetin territorial të këtij vendi. Ai vlerësoi përpjekjet diplomatike për një paqe të drejtë dhe të qëndrueshme.
Në lidhje me Lindjen e Mesme, Begaj kërkoi përfundimin e luftës në Gaza, lirimin e pengjeve dhe trajtimin e krizës humanitare, duke përshëndetur rolin e SHBA-së, Egjiptit dhe Katarit për arritjen e një armëpushimi të qëndrueshëm.
Një vend të veçantë në fjalën e tij zuri çështja e Kosovës. Presidenti Begaj theksoi se Kosova ka treguar se është një aktor përgjegjës në rajon dhe kontribuues i rëndësishëm në paqe dhe stabilitet. Ai kërkoi që vendi të njihet plotësisht dhe të marrë vendin e merituar në Kombet e Bashkuara, duke e quajtur këtë një akt drejtësie dhe garanci për sigurinë në Ballkanin Perëndimor.
Gjithashtu, Begaj u ndal edhe te të drejtat e shqiptarëve në Luginën e Preshevës, duke bërë thirrje që ata të mos diskriminohen, por të respektohen dhe integrohen, ndërsa gjuha, kultura dhe identiteti i tyre të mbrohen e promovohen.
Në vijim, Presidenti shqiptar theksoi përpjekjet e vendit në procesin e integrimit evropian, tranzicionin drejt energjisë së pastër, digjitalizimin dhe respektimin e të drejtave të njeriut. Ai veçoi avancimin e barazisë gjinore dhe fuqizimin e rinisë si shtylla të zhvillimit të qëndrueshëm të Shqipërisë.
