Presidenti i Kolumbisë, Gustavo Petro, ka bërë një deklaratë tronditëse përmes një postimi në rrjetin social X (ish-Twitter), ku akuzon drejtpërdrejt grupin kriminal të udhëhequr nga Dritan Gjika për tentativë atentati ndaj tij.
Sipas Petro-s, grupi me qendër në Abu Dhabi, të cilin e cilëson si “kartel të trafikut të drogës”, kontrollon një rrjet të gjerë prokurorësh në Kolumbi dhe ka lidhje të fuqishme në portin strategjik të Buenaventurës. Ai pretendon se i njëjti grup është përgjegjës për vrasjen e prokurorit paraguaian, Marcelo Pecci, si dhe për pengimin e hetimeve duke mbrojtur autorët brenda sistemit të drejtësisë kolumbiane.
“Ata kanë tentuar të më bëjnë atentat, por pa sukses,” shkroi Petro në deklaratën e tij publike, duke ngritur alarmin për infiltrimin e krimit të organizuar në institucione shtetërore.
Deklarata e Presidentit Petro vjen vetëm pak ditë pas arrestimit në Emiratet e Bashkuara Arabe të Dritan Gjikës, një 47-vjeçar shqiptar i shpallur në kërkim ndërkombëtar. Gjika u kap në Abu Dhabi dhe konsiderohet si një nga figurat më të rrezikshme në trafikun ndërkombëtar të drogës, sidomos në rajonin e Amerikës Latine dhe Evropës.
Sipas Ministrisë së Brendshme të Ekuadorit, Gjika ka qenë i përfshirë në trafik droge, pastrim parash dhe aktivitete të krimit të organizuar. Zyra e Prokurorit të Përgjithshëm të Ekuadorit e ka cilësuar atë si udhëheqësin e mafies shqiptare në vend, ndërsa për vite me radhë kishte arritur t’i shpëtonte drejtësisë falë arratisjes së tij.
Arrestimi i tij konsiderohet një goditje e madhe për rrjetin ndërkombëtar të trafikut të drogës, ndërkohë që hetimet për lidhjet e mundshme me atentatin ndaj Presidentit Petro pritet të thellohen në ditët në vijim.
