Në një ceremoni solemne të transmetuar live nga Shtetet e Bashkuara të Amerikës, Presidentja e Republikës së Kosovës, Vjosa Osmani, ndau medaljet presidenciale të meritës për anëtarët e mërgatës shqiptaro-amerikane që kanë kontribuar në mënyrë të jashtëzakonshme për lirinë, pavarësinë dhe shtetndërtimin e Kosovës.
Në fjalën e saj, Presidentja Osmani theksoi rolin historik të komunitetit shqiptaro-amerikan në momentet më të vështira për popullin e Kosovës. Ajo theksoi se kontributi i diasporës nuk u ndal asnjëherë, as në kohë lufte, as në ndërtimin e paqes dhe demokracisë.
“Sot, me nder dhe mirënjohje të thellë, ndajmë këto medalje për heronjtë tanë të heshtur në mërgatë – ata që ngritën zërin në sallat e Kongresit, që lobuan pa u lodhur, që mbajtën gjallë kauzën e Kosovës në zemër të Amerikës. Ju jeni pjesë e pandashme e historisë sonë,” – deklaroi Presidentja.
Ceremonia u mbajt në kuadër të vizitës së Presidentes në Washington D.C., ku po zhvillon një sërë takimesh me diplomatë dhe përfaqësues të komunitetit shqiptar, si pjesë e përpjekjeve për forcimin e aleancave ndërkombëtare të Kosovës, veçanërisht me SHBA-të.
Medaljet iu ndanë figurave të njohura të komunitetit shqiptaro-amerikan, përfshirë aktivistë, organizata humanitare dhe liderë të diasporës që kanë luajtur rol kyç në ndërkombëtarizimin e çështjes së Kosovës dhe në mbështetjen institucionale pas shpalljes së pavarësisë.
Ceremonia u transmetua drejtpërdrejt përmes rrjeteve sociale të Presidencës së Kosovës, duke shënuar edhe një akt simbolik të mirënjohjes shtetërore ndaj diasporës që ka qenë gjithmonë në anën e drejtësisë dhe lirisë.
