Presidentja e Republikës së Kosovës, Vjosa Osmani, ka bërë thirrje për përkushtim më të madh institucional dhe shoqëror ndaj fëmijëve, me rastin e Ditës Ndërkombëtare të Fëmijëve. Në një manifestim të organizuar për këtë ditë, ajo theksoi se mënyra se si trajtohen fëmijët është pasqyrë e së ardhmes së shoqërisë.
“E ardhmja jonë si shoqëri matet pikërisht nga mënyra se si i trajtojmë fëmijët tanë. Kjo nënkupton më shumë investime në arsim, më shumë mbrojtje nga dhuna, më shumë përkujdesje për shëndetin e tyre, më shumë dashuri dhe mundësi për secilin prej tyre, në mënyrë që të ëndërrojnë dhe t’i përmbushin ëndrrat e tyre”, deklaroi Presidentja Osmani.
Ajo e vuri theksin te arsimi cilësor, fëmijëria e lumtur, ambienti i sigurt dhe jeta me dinjitet si themele të një shoqërie të drejtë dhe të qëndrueshme.
Presidentja tha se kujdesi për fëmijët nuk është vetëm përgjegjësi e prindërve apo institucioneve shtetërore, por një detyrim kolektiv i të gjithë qytetarëve, duke apeluar për ndjeshmëri dhe veprim konkret në mbështetje të brezave të rinj.
Në fjalën e saj, Osmani e përmendi edhe ambasadorin amerikan William Walker, duke e falënderuar për kontributin e tij historik:
“Zëri i ambasadorit Walker për masakrën e Reçakut në arenën ndërkombëtare u bë vendimtar për shpëtimin e mijëra fëmijëve shqiptarë. Sot, në këtë ditë të fëmijëve, e urojmë edhe për ditëlindjen e tij.”
Dita Ndërkombëtare e Fëmijëve, e cila shënohet më 1 qershor, u përkujtua në Kosovë me aktivitete kulturore e edukative, duke vënë në pah rëndësinë e të drejtave të fëmijëve dhe nevojën për ndërtimin e një të ardhme më të sigurt për ta.
