Presidentja e Republikës së Kosovës, Vjosa Osmani, gjatë vizitës së saj në Riga, ritheksoi përkushtimin e vendit për të qenë një aleate e besueshme në mbrojtje të vlerave demokratike, duke theksuar rolin e Kosovës në sigurinë kibernetike dhe luftën kundër dezinformimit.
Në kuadër të kësaj vizite zyrtare, Osmani vizitoi Qendrën e Ekselencës së NATO-s për Komunikim Strategjik (STRATCOM) – një institucion kyç në përballjen me kërcënimet hibride dhe ruajtjen e integritetit të informacionit.
“Diskutuam për thellimin e bashkëpunimit në ndërtimin e kapaciteteve në fushën e sigurisë kibernetike dhe komunikimit strategjik, si pjesë e përpjekjeve të Kosovës për anëtarësim në NATO”, deklaroi Osmani pas takimit.
Gratë në qendër të proceseve demokratike
Presidentja e Kosovës zhvilloi gjithashtu një diskutim të hapur në Shtëpinë e Evropës në Riga, me gra lidere dhe aktiviste letoneze, ku ndau me to rrugëtimin e Kosovës nga një vend i dalë nga lufta në një demokraci funksionale.
“Kosova avancon përpara me gratë në qendër të çdo procesi demokratik dhe të sigurisë,” tha ajo, duke theksuar përkushtimin për barazi gjinore dhe përfshirje aktive në ndërtimin e paqes dhe demokracisë.
Reflektim mbi qëndresën kombëtare
Vizita e presidentes Osmani në Riga u përmbyll me një ndalesë simbolike në Muzeun e Okupimit të Letonisë, ku ajo përkujtoi rezistencën e përbashkët të popujve të Kosovës dhe Letonisë ndaj pushtimeve dhe padrejtësive historike.
“Si Kosova, ashtu edhe Letonia mbijetuan përmes rezistencës dhe krenarisë kombëtare. Kujtesa kolektive është forca jonë – për të mos harruar të kaluarën e lavdishme dhe për të ndërtuar një të ardhme të drejtë e të sigurt,” deklaroi presidentja.
Vizita e saj në Letoni vjen në një kohë të rritjes së angazhimit të Kosovës në strukturat euroatlantike, me synim anëtarësimin në NATO dhe fuqizimin e rolit të saj në arkitekturën e sigurisë ndërkombëtare.
