Presidentja e Republikës së Kosovës, Vjosa Osmani, ka nisur një vizitë zyrtare në Federatën e Malajzisë me ftesë të Kryeministrit malajzian, YAB Dato’ Seri Anwar Ibrahim. Vizita synon forcimin e marrëdhënieve bilaterale dhe zgjerimin e bashkëpunimit diplomatik e ekonomik mes dy vendeve.
Në kryeqytetin Kuala Lumpur, Presidentja Osmani do të pritet me një ceremoni zyrtare në kompleksin shtetëror Bunga Raya. Më pas, ajo do të zhvillojë një takim zyrtar me Kryeministrin Ibrahim në kompleksin qeveritar Perdana Putra, në Putrajaya. Pas takimit, të dy liderët do të mbajnë një konferencë të përbashkët për media.
Në shenjë respekti dhe mikpritjeje, Kryeministri malajzian do të organizojë një drekë zyrtare për Presidenten Osmani në rezidencën shtetërore Seri Perdana.
Gjatë kësaj vizite, Presidentja Osmani do të nderojë me Medalje Presidenciale të Meritave Kryeministrin aktual Anwar Ibrahim dhe ish-kryeministrin Abdullah Ahmad Badawi. Medaljet jepen si shenjë mirënjohjeje për përkrahjen e vazhdueshme të tyre ndaj Kosovës në arenën ndërkombëtare.
Një ndër momentet kyçe të vizitës është hapja zyrtare e Ambasadës së Republikës së Kosovës në Kuala Lumpur, e cila do të realizohet në prani të korit diplomatik dhe të ftuarve të tjerë. Ky veprim përbën një hap të rëndësishëm për forcimin e pranisë diplomatike të Kosovës në rajonin e Azisë Juglindore.
Në agjendën e Presidentes janë përfshirë edhe takime me përfaqësues të Dhomës Kombëtare të Tregtisë dhe Investimeve të Malajzisë (NCCIM), si dhe me përfaqësues të sektorëve të rëndësishëm ekonomikë, përfshirë atë të prodhimit, teknologjisë dhe turizmit. Qëllimi i këtyre takimeve është eksplorimi i mundësive konkrete për bashkëpunim ekonomik dhe nxitja e investimeve malajziane në Kosovë.
Vizita e Presidentes Osmani shënon një moment të rëndësishëm për avancimin e diplomacisë kosovare dhe rritjen e ndikimit të Kosovës në tregjet ndërkombëtare.
