Ndërsa vendi po i afrohet afatit të rregullt për mbajtjen e zgjedhjeve lokale, Presidentja e Republikës së Kosovës, Vjosa Osmani, ka nisur zyrtarisht procesin e konsultimeve me partitë politike për të caktuar datën e zhvillimit të tyre.
Takimi i parë në kuadër të këtij procesi pritet të mbahet të mërkurën, më 4 qershor 2025, ku Presidentja Osmani do të takohet me përfaqësuesit e subjekteve politike për të diskutuar dhe harmonizuar qëndrimet për datën e zgjedhjeve.
Lajmin e ka konfirmuar këshilltari për media i presidentes, Bekim Kupina, i cili deklaroi: “Në bazë të kompetencave kushtetuese, Presidentja Osmani ka ftuar subjektet politike në takim për konsultime për caktimin e datës së zgjedhjeve lokale. Menjëherë pas këtyre konsultimeve, Presidentja do të shpallë datën për mbajtjen e tyre.”
Ftesën për pjesëmarrje në takim e kanë konfirmuar tashmë dy prej partive kryesore në vend. Zëdhënësi i Lëvizjes Vetëvendosje, Arlind Manuxhka, deklaroi shkurt për mediat se “po, kemi pranuar ftesën”, ndërsa edhe zëdhënësi i LDK-së, Besian Mustafa, konfirmoi pjesëmarrjen në takim, duke theksuar se “takimi do të mbahet nesër në orën 14:00”.
Ndërkohë, deri në momentin e publikimit të këtij lajmi, Partia Demokratike e Kosovës (PDK) dhe Aleanca për Ardhmërinë e Kosovës (AAK) nuk kanë dhënë përgjigje nëse do të marrin pjesë në konsultime.
Në skenën politike, ndërkaq, partitë kanë nisur tashmë përgatitjet për zgjedhje. Disa prej tyre kanë konfirmuar edhe kandidatët për komunat më të mëdha dhe më strategjike të vendit, duke shënuar nisjen de facto të fazës paraprake të fushatës.
Pas caktimit zyrtar të datës së zgjedhjeve nga Presidentja Osmani, pritet që partitë politike të zyrtarizojnë edhe emrat e tjerë të kandidatëve dhe të intensifikojnë aktivitetet në terren.
