Presidentja e Kosovës, Vjosa Osmani, ka mbajtur sot një konferencë për media pas takimit me krerët e partive politike, ku ka shprehur shqetësimin për bllokimin e konstituimit të Kuvendit, një muaj pas seancës së parë.
Në fjalën e saj, Osmani bëri të ditur se në orët e pasdites do të zhvillojë takime edhe me përfaqësuesit e partive të komuniteteve pakicë, para se të udhëtojë për në Tiranë ku do të marrë pjesë në Samitin e Komunitetit Politik Evropian.
“Arsyeja pse po flas tani dhe jo pas takimit me përfaqësuesit e komuniteteve jo shumicë është se menjëherë më duhet të udhëtoj për në Tiranë,” tha Osmani, duke nënvizuar se temat e diskutimit në takimin me liderët e partive kryesore kishin të bënin kryesisht me bllokimin institucional.
Presidentja theksoi se, edhe pas 16 përpjekjesh, Kuvendi nuk ka arritur të konstituohet, duke e cilësuar situatën si të papranueshme dhe me pasoja të drejtpërdrejta për vendin dhe qytetarët.
“Nëse ka nevojë, nga java e ardhshme do të nis takime individuale me liderët politikë. Këto nuk janë konsultime për krijimin e qeverisë – kjo u takon partive – por diskutime për rrugën përpara drejt funksionalizimit të Kuvendit,” sqaroi Osmani.
Ajo shtoi se takimi ishte konstruktiv dhe i respektueshëm, dhe se ekziston vullnet i përgjithshëm për të gjetur një zgjidhje. Megjithatë, paralajmëroi se nëse bllokada vazhdon, është e gatshme ta adresojë çështjen në Gjykatën Kushtetuese.
“Tymi i bardhë del vetëm kur Kuvendi konstituohet. Nëse procesi zvarritet pafundësisht, do të shqyrtoj mundësinë e dërgimit të çështjes në Kushtetuese,” theksoi ajo, duke lënë të hapur edhe mundësinë e zgjedhjeve të reja, nëse nuk arrihet pajtueshmëri për konstituimin e Kuvendit.
