Dita e sotme shënon 26 vjet nga një prej krimeve më të rënda të luftës në Kosovë, ku më 1999, regjimi gjenocidal serb ekzekutoi barbarisht 275 civilë shqiptarë në Shtuticë, Verboc dhe fshatrat përreth të Drenicës. Viktima të këtij akti të tmerrshëm ishin fëmijë të pafajshëm, pleq, gra e burra – njerëz të pambrojtur, që u vranë vetëm pse ishin shqiptarë dhe kërkonin lirinë.
Kjo masakër, e cilësuar si një nga më të rëndat gjatë luftës, përfaqëson një plagë të hapur në ndërgjegjen njerëzore dhe një dëshmi e dhimbshme e përpjekjeve për shfarosjen e një populli të tërë. Ajo mbetet një thirrje e vazhdueshme për drejtësi dhe për kujtesë historike.
Në mesin e kësaj tragjedie, luftëtarët e Ushtrisë Çlirimtare të Kosovës, të prirë nga komandanti heroik Ilaz Kodra, qëndruan të pathyeshëm. Ata u bënë mburojë për popullin dhe, përkundër tmerrit, nuk u tërhoqën. 40 prej tyre ranë heroikisht, duke përjetësuar lirinë me gjakun e tyre.
Sot, në këtë përvjetor, përkujtohen me nderim jo vetëm martirët e kësaj masakre, por edhe qëndresa dhe sakrifica e atyre që dhanë jetën për lirinë e Kosovës.
Lavdi e përjetshme dëshmorëve të UÇK-së dhe kujtimi i paharruar për martirët e Shtuticës, Verbocit, Drenicës dhe mbarë Kosovës!
