Presidentja e Republikës së Kosovës, Vjosa Osmani, ka pritur në një takim zyrtar deputetët e Parlamentit të Mbretërisë së Bashkuar, Martin Vickers dhe Paul Foster, të cilët janë njëherësh përfaqësues të grupeve të miqësisë me Kosovën në legjislaturën britanike.
Në këtë takim është vlerësuar lart marrëdhënia e ngushtë dhe tradicionale mes Kosovës dhe Mbretërisë së Bashkuar, ndërsa është diskutuar për mënyrat konkrete të thellimit të bashkëpunimit ndërmjet dy vendeve, veçanërisht në fushat e ekonomisë, mbrojtjes dhe forcimit të pozitës ndërkombëtare të Kosovës.
Presidentja Osmani ka shprehur mirënjohje të veçantë për angazhimin dhe përkushtimin e deputetëve britanikë në mbështetje të Kosovës. Ajo ka theksuar se përkrahja e miqve të Mbretërisë së Bashkuar ka qenë dhe mbetet thelbësore në rrugëtimin euroatlantik të Kosovës, duke përfshirë proceset e integrimit ndërkombëtar dhe rritjen e njohjes globale.
Deputeti Martin Vickers, në cilësinë e Kryetarit të Grupit Ndërpartiak për Kosovën dhe Shqipërinë (All-Party Parliamentary Group for Kosovo and Albania), si dhe deputeti Paul Foster, Nënkryetar Ekzekutiv i “Labour Friends of Kosovo”, konfirmuan mbështetjen e fuqishme dhe të vazhdueshme të Parlamentit Britanik për shtetin e Kosovës dhe për aspiratat e tij drejt zhvillimit dhe integrimit ndërkombëtar.
Ky takim, i zhvilluar në një atmosferë miqësore dhe konstruktive, është një dëshmi e partneritetit të qëndrueshëm ndërmjet Kosovës dhe Mbretërisë së Bashkuar, si dhe një hap i rëndësishëm drejt forcimit të bashkëpunimit politik dhe strategjik mes dy vendeve aleate.
