Presidentja e Republikës së Kosovës, Vjosa Osmani, ka pritur sot në takim Dredhza Brainën, e cila së fundmi është shpallur fituese e vendit të parë në botë në garën prestigjioze Global Cybersecurity Woman of the Year, në kategorinë Barrier Breaker.
Gjatë takimit, Presidentja Osmani e uroi Brainën për këtë sukses të jashtëzakonshëm, duke theksuar rëndësinë që kanë arritje të tilla për afirmimin ndërkombëtar të Kosovës në sektorin gjithnjë e më të rëndësishëm të sigurisë kibernetike.
Presidentja vlerësoi gjithashtu edhe suksesin e Luanda Domit, e cila është shpërblyer me çmimin Cybersecurity Woman of the Year 2025 në kategorinë Supporter, në ceremoninë e mbajtur në Las Vegas. Sipas Osmanit, këto dy gra profesioniste kanë thyer barriera dhe kanë treguar fuqishëm potencialin dhe talentin e vajzave të Kosovës në skenën globale.
“Dy vajza të jashtëzakonshme që thyen barriera, ngritën flamurin e Kosovës në majë dhe dëshmuan se talenti i vajzave tona nuk njeh kufij. Ju jeni frymëzim për gjithë rininë e Kosovës,” u shpreh Presidentja Osmani.
Takimi u zhvillua në atmosferë mirënjohjeje dhe respekti për sukseset që dëshmojnë fuqizimin e grave në teknologji dhe inovacion, si dhe rolin e tyre kyç në ndërtimin e një shoqërie moderne dhe të sigurt digjitale.
