Presidentja e Republikës së Kosovës, Vjosa Osmani, priti sot në një takim zyrtar shefin e Zyrës së Bashkimit Evropian në Kosovë, z. Aivo Orav, me të cilin bisedoi për zhvillimet aktuale politike në vend, përfshirë procesin e konstituimit të institucioneve të reja dhe perspektivën evropiane të Kosovës.
Gjatë takimit, u trajtuan gjithashtu edhe pasojat dhe mesazhet e vizitës së fundit të Përfaqësueses së Lartë të BE-së për Politikë të Jashtme dhe Siguri, Kaja Kallas. Presidentja Osmani e cilësoi këtë vizitë, sikurse edhe vizitat e tjera të zyrtarëve të lartë evropianë, si një dëshmi e qartë e përkushtimit të Bashkimit Evropian për të mbështetur Kosovën në rrugën e saj drejt integrimit.
Në fokus të diskutimit ishte edhe rëndësia e avancimit të reformave, veçanërisht në fushën e sundimit të ligjit, si dhe forcimi i bashkëpunimit ndërmjet institucioneve të Kosovës dhe atyre të Bashkimit Evropian.
Presidentja Osmani theksoi se rruga e Kosovës drejt anëtarësimit në BE mbetet prioritet i palëkundur institucional, duke vënë në pah domosdoshmërinë e përmbushjes së standardeve demokratike dhe intensifikimit të bashkëpunimit bilateral me Brukselin.
