Gjatë vizitës së saj në New York, Presidentja e Kosovës, Vjosa Osmani, së bashku me Zotërin e Parë, Prindon Sadriu, zhvilluan një takim me Presidentin e Shteteve të Bashkuara, Donald J. Trump, dhe Zonjën e Parë, Melania Trump.
Takimi, i planifikuar fillimisht si një aktivitet protokollar, u shndërrua në një bisedë të gjatë dhe shumë përmbajtësore, sipas postimit të Presidentes Osmani në rrjetet sociale.
“Faleminderit Presidentit Trump për interesimin e veçantë që tregoi rreth rolit të pazëvendësueshëm të Amerikës në Kosovë dhe rajon, si dhe për angazhimin e tij të palodhshëm për paqe,” shkroi Osmani.
Ajo theksoi se miqësia dhe aleanca me SHBA-të mbetet boshti i pathyeshëm, duke shtuar se Kosova do të qëndrojë gjithmonë në krah të demokracisë, lirisë dhe partneritetit me Shtetet e Bashkuara, për shkak të lidhjes historike dhe vlerave të përbashkëta.
