Presidentja e Republikës së Kosovës, Vjosa Osmani, gjatë qëndrimit të saj në Riad, ka zhvilluar një takim me Presidentin e Mauritanisë, Mohamed Ould Cheikh El Ghazouani.
Nëpërmjet një postimi në rrjetet sociale, Presidentja Osmani e ka cilësuar takimin si “shumë të mirë dhe frytdhënës”, duke theksuar se bisedimet u përqendruan në forcimin e marrëdhënieve miqësore dhe bashkëpunimin bilateral ndërmjet dy vendeve.
“Biseduam për forcimin e marrëdhënieve miqësore ndërmjet Kosovës dhe Mauritanisë, gatishmërinë për të punuar së bashku në nivel ndërkombëtar, si dhe për angazhimin tonë të ndërsjellë në thellimin e bashkëpunimit bilateral,” – shkroi Osmani.
Takimi në Riad vjen në kuadër të angazhimeve të Presidentes Osmani për zgjerimin e marrëdhënieve ndërkombëtare të Kosovës dhe për konsolidimin e mbështetjes diplomatike nga vendet e Afrikës dhe Lindjes së Mesme.
